അനുഗ്രഹത്തോടെയാണ്‌
യാത്ര തുടങ്ങിയത്‌
പാതി വഴി പിന്നിട്ടപ്പോള്‍
പക്ഷെ വഴി മറന്നു പോയി
ദിശയെഴുതിയ കുറിപ്പും
കളഞ്ഞു പോയി
മുമ്പോട്ട് പോകുവാന്‍ വയ്യ
അധിനിവേശത്തിന്റെ
അമേരിക്കയില്‍
കൊളംബസെന്ന പോലെ
വഴി മാറിച്ചെന്നാല്‍-
തച്ചു തകര്‍ക്കപ്പെടുന്ന സംസ്കൃതികള്‍
തുടച്ചു നീക്കപ്പെടുന്ന മനുഷ്യര്‍
ആത്മാഭിമാനത്തിന്റെ ചോരപ്പുഴകള്‍
അന്ത്യകൂദാശകളാത്മരോദനങ്ങള്‍-
ദിശയറിയാത്ത യാത്ര
തിരിച്ചു വരവില്ലാത്ത
മറ്റൊരു ഭൂമികയിലേക്കു
നീണ്ടാല്‍-
അടിവേരുകളില്ലാത്ത
അപ്പൂപ്പന്‍താടിയായ്‌
ദേശാന്തരങ്ങളിലൂടെ
മോക്ഷം തേടിയുള്ള യാത്രയും വയ്യ
പിന്നിട്ട വഴികളിലേക്കു
തിരികെച്ചെന്ന്
കുറിപ്പു തിരഞ്ഞാലൊ..?
പിറകോട്ടു തിരയാന്‍ വയ്യ-
പിന്നിട്ട വഴിയിലെ പ്രലോഭനങ്ങള്‍
അയാള്‍ക്കേ അറിയൂ-
കഥ പറച്ചിലിന്റെ നഖമുനകള്‍
വിവസ്ത്രമാക്കിയ മയില്‍പ്പീലിത്തുണ്ട്
ഇരുളിലിഴ മുറിയാത്ത തീമഴയായ്‌
പെരുങ്കളിയാട്ടം
പ്രളയം വരുമെന്നറിഞ്ഞിട്ടും
അഭയത്തിനൊരാലില
കാത്തു വെക്കാതെ പോയ
പ്രണയം
മൌനം വെടിഞ്ഞു
മന്ത്രം ജപിക്കുന്ന
മദ്യക്കുപ്പികള്‍
പിന്നെ കുന്നിറങ്ങി വരുമ്പൊള്‍
നാലാമത്തെ വളവില്‍
പിറകെയോടിയ കൊടിച്ചിപ്പട്ടി
നീലാണ്ടന്‍ കാവിലെ ഇരുളില്‍ വെച്ച്‌
പനി പിടിപ്പിച്ച പ്രേതങ്ങള്‍
നീല ശംഖുപുഷ്പത്തിന്റെ മറവില്‍
ഇല്ലിവേലിക്കുള്ളിലൂടെ
തല പുറത്തേക്കു നീട്ടിയ ശംഖുവരയന്‍
പ്രലോഭനം കുരുക്കിട്ടെങ്കിലൊ ?
ഇനി ഈ തുരുത്തില്‍
കുറ്റിയടിച്ചു കെട്ടിക്കിടക്കാം -
No comments:
Post a Comment