സായാഹ്നയാത്ര

സന്ധ്യക്കുള്ള യാത്രകള്‍
നീ ഇഷ്ടപ്പെടുന്നില്ലേ ?

മങ്ങിയ വെളിച്ചത്തില്‍
മുങ്ങിയ പുറം കാഴ്ചകളെ,

മറയ്‌ക്കപ്പെടുന്ന സത്യങ്ങള്‍ പോലെ
ഇരുളില്‍ മറയുന്ന വന്‍മരങ്ങളെ,

ശിഥിലമായ ചിന്തകള്‍ പോലെ
ചിതറി നീങ്ങുന്ന മനുഷ്യരെ,

ദീപാലംകൃതമായ അമ്പലങ്ങളെ,
പള്ളിമണി മുഴക്കുന്ന ദേവാലയങ്ങളെ,

വെറുക്കുന്ന തുറിച്ചുനോട്ടം പോലെ
പ്രകാശിക്കുന്ന മണിമാളികകളെ,

കടത്തിണ്ണകളില്‍ കീറിയ പുതപ്പുകളില്‍
ഉറക്കം ബാധിച്ച ജീവിതങ്ങളെ,

നിലാവു വീണ തെരുവുകളില്‍
നിഴലിച്ചു കാണുന്ന പെണ്‍ചിരികളെ,

അകലെ പെയ്തു തുടങ്ങുന്ന
മഴയുടെ നനവിനെ..,

നിനക്കിഷ്ടമല്ലെ
ഈ കാഴ്ചകളൊന്നും ?

കാഴ്ചകള്‍ക്കു കനം വെച്ചു
കണ്ണുകള്‍ ഇരുള്‍ മൂടുന്നതിനു മുമ്പേ,

ചെമ്പരത്തിപ്പൂവുകള്‍ വിടരുന്ന
ഒരു രാത്രിയുടെ മുറ്റത്ത്‌
ഈ യാത്ര തീരും മുമ്പേ,
നീ വരില്ലേ
സായാഹ്നയാത്രയ്ക്കായി ?